A Changana Cuba Jam Party chega a Verín no marco da axenda de actividades do FIC Vía XIV

• A sesión, que mesturará música electrónica cubana e percusión, terá lugar o 5 de decembro no pavillón da vila

Verín, 07 de novembro de 2019.- O pavillón deportivo de Verín acollerá o vindeiro 5 de decembro a Changana Cuba Jam Party, unha actividade musical que combinará música electrónica cubana a cargo do coñecido DJ Joyvan Guevara Díaz e percusión por parte de Williams Richart Cardoso, tamén procedente de Cuba. “Trátase dunha animada sesión musical que chega ata a nosa vila como unha acción enmarcada dentro da axenda de ocio e de lecer que estamos a promover dende a organización do Festival de Curtas”, destaca Carlos Montero, director do certame.

Precisamente, no marco da programación paralela do FIC Vía XIV inclúese este ano unha retrospectiva de cinema cubano, dentro da cal se exhibirán diferentes curtas realizadas no país nos últimos anos. “Ocorreusenos ir un paso máis alá e, ademais de achegar a tendencia do que se está a facer no eido audiovisual cubano, traer ata Verín dúas figuras representativas do son e da música actual na illa”, engade Montero.

Djoy de Cuba

A sesión musical que se propón aos verineses correrá a cargo de Joyvan Guevara Díaz, máis coñecido como Djoy de Cuba, e Williams Richart Cardoso. O primeiro deles é un dos “pinchadiscos” máis coñecidos na escena musical da Habana e un dos pioneiros do movemento rave cubano alternativo. O segundo é célebre, tamén no país caribeño, polas súas facetas de percusionista, batería, compositor, produtor musical e cantante.  “Xuntos traerán ata Verín unha combinación de estilos musicais que, estamos seguros, non defraudará a ninguén”, conclúe Carlos Montero.