As dúas caras do Sáhara Occidental é unha actividade paralelaque ten como misión amosar, dende a cinematografía, unha realidade en conflito (a vida dentro e fóra dos campos de refuxiados nesta zona) a través de diversos puntos de vista.
Xa o ano pasado, no FIC Vía XIV levouse a cabo unha actividade cinematográfica que amosou o conflito palestino-israelí dende diversos ángulos e a través do cine. Deste xeito, As dúas caras do Sáhara Occidental da continuidade a esta pretensión do Festival de Curtas de Verín de erixirse coma espazo de diálogo e punto de encontro a través do cine.
A Dirección do FIC Vía XIV considera interesante dar a coñecer en Verín diferentes realidades políticas, especialmente nestes tempos convulsos marcados pola inestabilidade política e económica.
Esta actividade divídese en dúas sesións. Na primeira exhibirase a longametraxe Hamada, de Eloy Domínguez, presentada polo propio director e cun coloquio posterior ao visionado. Na segunda das sesións, amosaranse as curtas L´Aarifa de Mohamed Salem Lansari, Braham Chagaf e Digya Mohamed-Salm e Tres cámaras roubadas, un proxecto colectivo de Equipe Media.