Esta actividade paralela que se desenvolverá ao abeiro do FIC Vía XIV proponnos unha viaxe a través das bandas sonoras do cinema da man de Edelmiro L. Mateo, responsable da Coral Polifónica da vila. No marco desta actividade, na que participará a propia Coral, tamén haberá unha actuación da Agrupación Instrumental Infantil do Conservatorio de Verín, dirixida por Miguel Ángel Guerra.
Trátase dunha actividade que pretende por en valor o importante papel que a música ten no cinema. De feito, son moitas as bandas sonoras que se teñen convertido en clásicos ao pasar a formar parte do acervo e do patrimonio cultural de todos os cidadáns.
Cámara e batuta analizará o camiño paralelo que teñen trazado estas dúas actividades irmáns, que son a música e o cinema. No marco desta actividade, efectuarase un repaso, pois, de dúas disciplinas que están intimamente ligadas e detallaranse claves sobre os efectos que a música xoga na narrativa audiovisual.