Venres 2 de setembro. 20.30h. Auditorio
O Galician Freaky Film Festival é o evento de cinema e cultura freak definitivo. Un festival que amosa unha coidada selección de pezas audiovisuais que adoitan verse privadas das canles habituais de distribución. Pezas moitas veces inéditas en Galicia, con estreas nacionais, internacionais e mundiais. Por iso, este ano o Festival Internacional de Curtametraxes de Verín quere render homenaxe a este singular certame traendo ata Verín algunhas das súas proxeccións máis singulares e ao seu director, Juan de Castro, para participar nun coloquio co público.
Xunto as gamberras proxeccións, que beben directamente do ambiente do mítico Festival de Cine de Terror de San Sebastián, no marco do Galician Freaky Film Festival teñen lugar cada ano encontros entre profesionais, exposicións de arte, presentacións e performances. Todo isto cun único obxectivo: converter a Vigo na cidade de peregrinación freak. Agora, Verín poderá compartir un anaco desa experiencia.
