O Vía XIV FIC, no seu camiño de converterse nun contedor cultural no que se impulsan diferentes tipos de actividades, contará este ano coa denominada Zona Roombo, unha nova localización do festival fora do propio Auditorio de Verín onde a organización pretende expandir as liñas de actividades que aúnan gastronomía, música, encontros profesionais e espontaneidade cultural.
Esta nova iniciativa é posible grazas á colaboración entre a empresa local Roombo e a Asociación Cultural Vía XIV. As actividades propostas no marco deste espazo pretenden achegar o universo FIC Vía XIV a novos públicos. Así, dentro da parte gastronómica, este espazo acollerá actividades de cata tanto de cervexas como de viños da Denominación de Orixe Monterrei. Ademais, contará cunha área de restaurante con bebidas e alimentos ao dispor dos visitantes.
