O Festival de Curtas de Verín promoverá iniciativas formativas orientadas a profesionais que queiran mellorar as súas competencias en diferentes disciplinas ligadas ao ámbito audiovisual

  • Esta axenda de actividades tamén se dirixe a un público amateur interesado en afondar en coñecementos sobre a cinematografía e os seus campos afíns

A organización do FIC Vía XIV propón para este 2023 unha serie de actividades formativas dirixidas principalmente a profesionais que desenvolvan a súa actividade no eido audiovisual e queiran mellorar as súas competencias arredor dunha serie de disciplinas ligadas a este ámbito de actividade. Porén, tamén, esta axenda formativa se dirixe a un público de carácter amateur interesado en coñecer máis de preto detalles da cinematografía e das súas áreas afíns.

Neste sentido, unha das actividades máis destacables que se porán en marcha será un obradoiro de interpretación perante a cámara. Unha iniciativa de 22 horas de duración, dirixida e impartida por Santi Cañaveral e Álex Mallo, orientada a aquelas persoas que participan, xeralmente, como afeccionados nos diferentes grupos de teatro que existen na vila de Verín; uns 200 homes e mulleres, especialmente xente nova. Nos últimos anos, estes grupos foronse achegando ao audiovisual a través de gravacións -profesionais ou domésticas- coas que experimentan novas narrativas visuais.

Este obradoiro, que se desenvolverá nas xornadas do 8, 9 e 10 de setembro, pretende explorar técnicas fundamentais para actuar con naturalidade e confianza ante a cámara. Ofreceranse claves para transmitir emocións, expresións e mensaxes a través do movemento, o ton da voz e a linguaxe corporal. Ademais, proporcionarase aos participantes a oportunidade de practicar en escenarios simulados coa finalidade de que poidan mellorar as súas hábilidades para o desenvolvemento de proxectos interpretativos. O FIC Vía XIV promove esta actividade en colaboración coa Escola de Teatro Kotodama.

Outra destas actividades, dirixida por Sabela Souto, unha das profesionais que integran o cadro de persoal do FIC, é un relatorio divulgativo sobre o papel dos cineclubes en Verín ao longo da súa historia. Iniciativas que se consideran fundamentais para comprender a esencia e a acollida do que hoxe é o Festival de Curtas Vía XIV. Esta actividade porá en valor o papel dos protagonistas daqueles movementos cinéfilos co obxectivo de axudar a recuperar e salvagardar na memoria colectiva a súa relevancia. A iniciativa pretende, en definitiva, analizar e estudar a evolución destes cineclubes dende un triple punto de vista: audiovisual, sociolóxico e histórico.

Xunto a isto, neste 2023, dende o Festival de Curtas de Verín impulsarase un seminario dirixido a aqueles creadores e creadoras que desexen iniciarse no emprego de ferramentas de Intelixencia Artificial para o desenvolvemento dos seus traballos audiovisuais. Durante unha sesión de traballo impartida por Alfonso Sola Limia, filósofo e creador especializado en novas tecnoloxías, ofreceranse claves sobre como manexar con soltura estas ferramentas.

Ademais, en colaboración con Proxecta, a Coordinadora Galega de Festivais de Cinema, a organización do FIC Vía XIV propón unha mesa redonda orientada ao sector profesional na que se contará coa participación de diferentes directores e responsables de diversos certames cinematográficos galegos para debater sobre aspectos relacionados co estado do sector audiovisual en Galicia. Está previsto tamén que na mesa participen técnicos e profesionais doutros eidos e disciplinas culturais, e non só do ámbito cinematográfico.

O rural suscita, cada vez máis, a atención dos creadores audiovisuais e do gran público. Por iso, a organización do FIC Vía XIV de Verín considera fundamental crear espazos de encontro nos que os artistas, representantes de entidades e traballadores do sector poidan debater formalmente sobre as necesidades e posibilidades que o audiovisual representa para o rural. O apoio a novos creadores nestas zonas, o fomento de novos públicos, o aproveitamento dos produtos audiovisuais ou a achega ás últimas tendencias a vilas de menor dimensión serán algúns dos asuntos que ocuparán este encontro informal dentro da programación paralela do FIC Vía XIV 2023.

Para participar nas diversas actividades que se propoñen nesta axenda especial para profesionais e público amateur interesado no audiovisual, é preciso inscribirse previamente en cada unha delas xa que contan con aforo reducido. En breve, a través da páxina web e das redes sociais do FIC achegaranse detalles sobre a data, hora e duración de cada unha destas accións e sobre os pasos para que aqueles interesados e interesadas poidan formalizar a súa inscrición nelas.

Leave a comment

O teu enderezo electrónico non se publicará Os campos obrigatorios están marcados con *