Os festivais de cinema, como o FIC Vía XIV, érguense como faros de pensamento crítico, ofrecendo un espazo no que as películas transcenden o seu papel proopiamente visual para converterse en catalizadores de diálogo e acción.
Son foros nos que a audiencia é desafíada a contemplar, debater e actuar ante as cuestións apremiantes do noso tempo, lembrándonos que a cinematografia pode ser moito máis que unha distracción: pode ser un medio poderoso para moldear a comprensión colectiva e catalizar o cambio..
Neste sentido, o noso certame ensancha e afina a súa axenda en cada nova edición para tentar converter Verín no epicentro da cultura do sur de Ourense. E xa non só durante a semana na que adoita celebrarse, a segunda de setembro, senón ao longo de todo o ano, coa intención última de converterse nun contedor cultural de carácter estable dentro da vila.
Da calzada romana que cruza o val atravesado polo río Támega dende hai máis de 2000 anos, toma o nome o noso festival. Evocando unha ruta física, trazamos un camiño cultural para atraer a mirada de creadores e creadoras de todo o mundo ata Verín e achegar á cinematografia a unha contorna particularmente periférica dentro da nosa comunidade.
Poñer en marcha un evento distas características nun territorio afastado do circuito de festivais, no interior de Galicia, supón un verdadeiro reto, que se traduce no gratificante froito de contribuir á dinamización cultural dun espazo xeográfico marcado por unha forte impronta rural
Facelo é posible grazas a un equipo que asume o traballo con paixón e que foi medrando paseniñamente, creando canteira e incorporando ao seu cadro de persoal a persoas que comenzaron traballando ao abeiro do certame como axudantes ou bolseiros, hoxe convertidos xa de forma plena en profesionais do audiovisual de primeiro nivel.
A nosa sección oficial divídese na actualidade en catro categorías ben definidas arredor de diferentes elementos que definen a idiosincrasia da bisbarra como poden ser os conceptos de Fronteira, Emigración ou Entroido. Amais das categorías Horizontes, A Raia e Nova, o FIC Vía XIV incorporou tamén unha categoría destinada á cativada de Verín baixo a denominación de Infantil. Deste xeito, trátanse de achegar os valores do cinema aos máis pequenos e pequenas, novos públicos que serán os espectadores do mañá.
O FIC evoluciona parello ás sensibilidades da sociedade e ten proxectado curtas de diferente temática, así como programado actividades paralelas destinadas a concienciar ao público sobre realidades tales como a realidade dos refuxiados, a sostibilidade e preservación do medio ambiente, a loita contra o cambio climático ou a igualdade entre homes e mulleres, por citar só algúns exemplos.
Pero, sobre todo, o FIC Vía XIV de Verín singularízase porque transcende o ámbito puramente cinematográfico. Programa cada ano diferentes actividades paralelas relacionadas coa música ou a gastronomía, entre outras disciplinas, así como obradoiros orientados a perfís máis profesionais co obxectivo de que éstes poidan enriquecer os seus currículums e xerar redes de networking.
Xunto a isto, o festival ten moi en conta a opinión dos seus espectadores e, aparte dos premios outorgados polo xurado profesional, cada ano abre unha votación popular para que a veciñanza elixa a súa curta favorita. Elementos diferenciais, todos eles, que se complementan coa idea de facer partícipes do certame a artistas da bisbarra, dándolles a oportunidade de que se coñeza a súa obra e de ser integrantes deste foro de dinamización cultural.
Baixo a perspectiva, pois, de continuar medrando e axudando a fortalecer a marca “Verín” imos seguir traballando dende o FIC Vía XIV. Que cineastas de diversas partes do mundo se acheguen ata a nosa localidade para expoñer as súas obras é un fito moi relevante para un territorio das nosas dimensións.
Como tamén o é o feito de que o noso festival poña o seu selo nos créditos de cada curta, un marchamo que vai viaxar sempre polo mundo achegando o nome do noso recuncho xeográfico, emprazado no sureste de Ourense, a diferentes partes do globo a través da maxia do cinema.
