Un grupo de estudantes europeos acode á proxección dos filmes integrados na retrospectiva ‘As dúas caras do Sahara Occidental’ do FIC Vía XIV

• Un grupo de 20 alumnos de Finlandia, Hungría, Italia e Portugal, que visitan o I.E.S Xesús Taboada Chivite no marco do programa Erasmus +, participaron esta mañá na axenda de actividades paralelas do certame verinés

Verín, 05 de decembro 2019.- Un grupo de 20 estudantes, procedente de diversos países coma Finlandia, Hungría, Italia e Portugal, tivo a oportunidade de visionar a programación integrada no marco da actividade paralela ‘As dúas caras do Sahara Occidental’, durante a mañá do xoves 5 de decembro na Casa da Cultura de Verín.

A mostra de filmografía do Sahara ten como misión amosar, dende a cinematografía, unha realidade en conflito (a vida dentro e fóra dos campos de refuxiados nesta zona) a través de diversos puntos de vista. “Cremos relevante traer ata Verín, no marco do festival, diferentes realidades políticas que é preciso dar a coñecer, especialmente nestes tempos convulsos que vivimos, marcados pola inestabilidade política e económica”, destaca o director do FIC, Carlos Montero, a propósito da actividade.

As dúas caras do Sahara Occidental divídese en dous bloques. No primeiro exhibiuse a longametraxe “Hamada”, de Eloy Domínguez, que foi presentada polo propio director e cun coloquio posterior ao visionado. Na segunda das sesións, amosaranse as curtas “L´Aarifa” de
Mohamed Salem Lansari, Braham Chagaf e Digya Mohamed-Salm e “Tres cámaras roubadas”, un proxecto colectivo de Equipe Media.