- O Festival de Curtas de Verín celebrarase entre o 30 de novembro e o 8 de decembro
Verín, 27 de xuño de 2019.- A IV edición do Festival Internacional de Curtas de Verín (FIC Vía XIV), que se desenvolverá na vila entre o 30 de novembro e o 8 de decembro vindeiros, ten xa a súa primeira actividade paralela confirmada. Trátase dunha retrospectiva de curtametraxes representativas do cinema cubano actual, todas elas realizadas entre os anos 2015 e 2019.
A produtora e directora artística de orixe cubana, Claudia Expósito, é a encargada de realizar a escolma de curtas que se exhibirán en Verín no marco desta iniciativa. Expósito ten participado, dende o ano 1993, nuns 150 espectáculos musicais, festivais, eventos e proxectos audiovisuais. Xunto a isto creou e produciu varios espazos artísticos culturais como Xogo de Malabares, Puntal Alto ou A Guitarra Limpa, entre outras.
Vocación social
O director do FIC Vía XIV, Carlos Montero, destaca que esta retrospectiva, que será exhibida en dous bloques diferentes como programación paralela á do propio festival, constitúe “un perfecto exemplo da vocación social que ten o certame e que posibilita conectar Verín con outras realidades e culturas a través do cinema”.
No marco desta retrospectiva poderán verse en Verín as curtas Ángela, de Juna Pablo Daranas; Las muertes de Arístides, de Lázaro Lemus; Los viejos heraldos, de Luis Alejandro Yero; Gloria eterna, de Yimit Ramírez; Casa de la noche, de Marcel Beltrán; No country for old squares, de Yolanda Durán y Ermitis Blanco; El Pescador, de Ana A. Alpízar e Paisaje, de Daiyan Noa.
Deixa unha resposta