Verín acollerá a estrea oficial do documental Entroidar no decurso da vindeira edición do FIC Vía XIV

• O director do documental, o compostelán Pablo Ces, destaca que “non se me ocorre mellor escenario posible para a estrea que o lugar no que se xerou o proxecto”

Verín, 19 de xuño de 2020.- Verín acollerá a estrea oficial do documental Entroidar, dirixido polo compostelán Pablo Ces, que é membro do staff do FIC Vía XIV dende a súa segunda edición. Precisamente, a vindeira edición do Festival Internacional de Curtas de Verín será o marco elixido para a estrea dun proxecto que se xerou ao abeiro do propio certame. “Non se me ocorre un mellor escenario posible” para a primeira proxección oficial “do documental”, destaca o seu director.

O documental está especificamente centrado na singularidade do Entroido de Laza, “un  lugar no que este se vive case coma unha relixión”. Tras a súa primeira visita a este Entroido, en 2018, Ces quedou impresionado pola autenticidade da festa e decidiuse a filmar un documental de índole etnográfica, que agarda poida ter percorrido “en diferentes festivais”. De feito, Ces ten confirmada tamén unha proxección de Entroidar no Festival de Cine Internacional de Ourense (OUFF), que se celebrará a finais de setembro.

O director do documental confirmou tamén que espera poder realizar unha pre-estrea da súa obra en Laza, para devolver así ao pobo e as persoas que participaron na peza “o agarimo co que foi tratado o equipo que filmou o traballo”.

Piares

Entroidar é un documental que se sostén sobre varios piares fundamentais: as personaxes que fan posible o Entroido, os lugares nos que se fai e a propia celebración. Tal como destacou o director, o documental busca desbotar mitos e quere achegar unha ollada a “como se transforman as persoas que están detrás das personaxes do Entroido de Laza”.

Durante a pasada edición do FIC Vía XIV, celebrada en 2019, exhibiuse un avance deste documental e celebrouse un coloquio posterior no que participou o seu director, Pablo Ces. Cunha dilatada traxectoria no eido audiovisual, Ces conta cun premio Mestre Mateo, que obtivo en 2011 polo documental As silenciadas.

Máis info sobre o proxecto en www.entroidar.com