ENTROIDO – OUTRA MIRADA. Categoría dedicada ó Entroido, entendendo o termo no seu máis amplo sentido e cun significado metafórico de cambio de roles, que recollerá obras que destrúen as regras cartesianas, que crean espazos alternativos, obras que experimentan coa linguaxe cinematográfica, que manexan códigos surrealistas e oníricos. Novos xeitos de contar, cinema da emoción e da experiencia. É a sección máis libre do festival onde, como sucede co Entroido, todo pode suceder.
MIGRACIÓN/FRONTEIRA – HORIZONTES. Categoría na que se incidirá na idea do horizonte como liña imaxinaria e invisible, lonxana e inalcanzable, de gran violencia emocional e simbólica como metáfora da Migración. Por outra banda, o horizonte como liña que separa o aquí do aló, como unha sorte de Fronteira entre onde estamos e calquer outro lugar.
GALEGO/PORTUGUESA – A RAIA. Algúns dos mellores filmes do mundo son feitos dende as beiras dun río pequeno e silencioso... Dada a singularidade do noso territorio, do Val do Támega dividido pola Raia, e da nosa historia de Emigración e Fronteira con todos os seus significados en ámbalas dúas beiras, esta categoría acollerá curtas de cineastas de Galiza e Portugal.
NOVA. Serán seleccionadas curtas que non teñen cabida nas temáticas categorizadas, trátase dunha categoría xeral que recollerá filmes contemporáneos, cinema de autor e obras que non se rixen por formatos industriais obsoletos. Como unha estrela anana de brillo repentino por unha explosión termonuclear no seu seo.
