A calzada romana Vía XIV cruza o Val do Támega dende hai máis de 2000 anos. Case esvaecida hoxe, foi substituída polas actuais vías de comunicación que atravesan o noso val… algunhas construídas sobre a propia calzada romana, outras discorren parellas ó antigo camiño.
Ó longo deste tempo, as antigas vías foron o elemento catalizador na transmisión da cultura e na expansión da civilización romana; foron camiños de novas ideas, de progreso e de comunicación entre os pobos.
O Festival Internacional de Curtas Vía XIV quere continuar con ese camiño de cultura, atraendo a mirada de creadores de todo o mundo ata a vila de Verín. O papel das curtas no mundo do cine é fundamental como eixo de expresión, pero tamén como curtiduría de novos valores que atopan na limitación da historia curta unha tensión positiva para condensar a capacidade de narrar, de expresarse e de transmitilo nunha obra audiovisual.
O FIC Vía XIV naceu para encauzar esta tensión narrativa, para mostrar como a creatividade audiovisual é quen de transmitir a esencia dos milleiros de significados que poden ter os elementos que definen a idiosincrasia da nosa bisbarra: o Entroido e a Raia (Fronteira-Emigración).
