Cinema de historias
A actividade Cinema de historias, financiada pola Mancomunidade de Municipios da Comarca de Verín, e impartida pola contacontos Raquel Queizás, pretende divertir e espertar nas nenas e nos nenos o amor polo cine e descubrirlles o poder que teñen as imaxes para transmitir historias. Será Alice Guy, a nai do cinema, a que esperte a súa curiosidade pola orixe da sétima arte.
Alice, dende ben pequena, escoitou contos da súa avoa que fixeron agromar nela o amor polos libros. Co paso do tempo chegou a ser unha gran contadora de historias que logo levaría á gran pantalla. No marco desta actividade, teremos ocasión de viaxar no tempo para ver fragmentos das súas primeiras películas e das súas primeiras animacións.