Máis de medio milleiro de nenos e nenas procedentes de diferentes centros educativos de Verín e comarca desfrutan no FIC Vía XIV da actividade Vémonos no Futuro, dirixida pola narradora oral Raquel Queizás

  • A cativada puido tamén gozar da proxección de catro curtas encadradas na categoría infantil, de nova creación no certame: O monstro e a nena, Ovo, Papirola e Chimborazo

 

O FIC Vía XIV de Verín programou esta mañá, con grande éxito de afluencia, unha actividade destinada ao público infantil baixo a denominación Vémonos no futuro, que foi dirixida pola narradora oral Raquel Queizás. “Dende a organización do certame non queremos deixar a ningún grupo de idade atrás e consideramos que achegar o cinema aos rapaces e rapazas de Verín e comarca é fundamental para axudar a conformar espectadores críticos para o día de mañá”, considera Carlos Montero, director do FIC Vía XIV en relación a esta actividade.

Ademais, por vez primeira, o máis de medio millar de nenos e nenas procedentes de diferentes centros educativos de Verín e comarca que participaron na  iniciativa puideron visionar unha serie de curtas programadas especialmente para eles no marco dunha sección de nova creación no festival: a categoría infantil. Nela, programáronse as curtas O monstro e a nena, Ovo, Papirola e Chimborazo. Ao tratarse dunha categoría oficial, o xurado elixirá tamén o mellor dos traballos exhibidos na mesma, que recibirá un premio específico.

A actividade dirixida por Raquel Queizás, unha veterana colaboradora do FIC, versou sobre ciencia ficción e metacine. “Este espectáculo, que levou por título Vémonos no futuro, mestura a narración oral co teatro e co cinema e pretendeu convidar á rapazada a realizar unha fantástica viaxe no tempo”, destaca Queizás.

“Coa actividade tentei axudar aos pequenos e pequenas a conectar o poder da literatura co do cinema para imaxinar futuros: futuros pasados. Puidemos coñecer as primeiras adaptacións literarias de ciencia ficción levadas para a gran pantalla e gozamos dos pioneiros efectos especiais”, abonda a narradora oral.

 Con posterioridade, a partir 22.00 horas, terá lugar na Praza García Barbón de Verín a actuación do grupo Caspervek, que musicalizará en directo algunhas das curtas máis representativas do cinema mudo. Empregando elementos do jazz clásico, a música contemporánea, o folk ou a electrónica, os membros deste grupo construirán un espazo performativo propio onde a percepción sensorial terá un papel fundamental.

As persoas que asistan a esta actividade poderán desfrutar do visionado dunha selección de curtametraxes, que inclúe os títulos Viaje a la luna, Alicia en el país de las maravillas, Felix go west, Les Kiriki e La casa eléctrica, mentres os integrantes de Caspervek lle poñen o seu acento musical propio.

Leave a comment

O teu enderezo electrónico non se publicará Os campos obrigatorios están marcados con *