Como parte da súa axenda de actividades paralelas, a quinta edición do FIC Vía XIV de Verín acolle a proxección do documental histórico Hijas de Galicia, Macorinas, dirixido por Xosé Lois Santiago “Pello”, natural de Castrelo de Val, e Fran Naveira, orixinario da Coruña. Trátase dun traballo que conta a historia de explotación dunha parte da emigración feminina galega a Cuba, establecendo analoxías con situación que acontecen na actualidade en diferentes partes del mundo.
O documental narra a historia da asociación “Hijas de Galicia”, formada por esas mulleres emigradas galegas e pon de manifesto diversas historias de protagonistas que sufriron enganos para entrar a formar parte da prostitución cubana a comezos do século pasado.
“A situación non deixa de ser similar á doutras mulleres que hoxe en día emigran á nos aterra, ou a outros lugares, e rematan levando a cabo a mesma función, sendo explotadas por mafias sexuais”, destaca o co-director do documental, Xosé Lois Santiago “Pello”.
Ober información, datos e imaxes destas mulleres emigrantes galegas convertiuse nun labor moi complicado, debido principalmente ao escurantismo e as doses de vergoña que implica o concepto de prostitución.
“O noso medo inicial ao chegar a La Habana era non atopar suficiente información sobre o tema. Pero isto esvaeceuse cando comezamos a falar cos nosos asesores e contactos”, destacan os directores desta obra documental.
A partir deste momento, un mundo que ata o daquela estivera agochado, saiu á luz e afloraron diversas testemuñas que os autores da obra recolleron nas súas visitas a illa, durante os anos 2012 a 2019.
