- A imaxe grafica do vindeiro Festival foi creada por Aurora López Pérez, natural de Albarellos de Monterrei
Verín, 13 de outubro de 2018.- Un total de 1.261 curtas procedentes de 55 países dos cinco continentes optan a participar na III edición do FIC Vía XIV, que se celebrará en Verín entre o 1 e o 9 decembro. O prazo de presentación dos traballos expirou o pasado xoves, día 11, e nos próximos días o equipo organizador do Festival encargarase de seleccionar aquelas curtas que mellor encaixen nas catro categorías do certame: Outra Mirada, Horizontes, A Raia e Nova.
As curtas que aspiran a participar no Festival proceden de países tan diversos como España, Portugal, Brasil, Arxentina, Colombia, Perú, Venezuela, Sudáfrica, India, China, Japón, Corea do Sur, Australia, Tailandia ou Taiwán, entre moitos otros.
A organización do FIC Via XIV agarda que a calidade dos traballos que se exhiban durante os nove días de certame sexa igual ou superior á das dúas primeiras edicións do concurso. Neste sentido, varias das curtas programadas o pasado ano foron distinguidas, posteriormente, en diferentes convocatorias de premios e certames tales como os Goya ou Sundace ou seleccionadas para os carteis oficiais de festivais de recoñecido prestixio internacional tales como San Sebastián, Toronto, Rotterdam ou o New York Film Festival, entre outros.
Cartel ilustrador
Por outra banda, a III edición do FIC Vía XIV conta xa con cartel ilustrador. Trátase dun deseño de Aurora López Pérez, natural de Albarellos de Monterrei, cuxa idea gráfica se sustenta na mirada do espectador. “Quixen involucrar ao que mira, ao que desfruta do cinema, cunha mirada que é global e que é feminina, porque neste 2018, no Ano das Mulleres, non podería ser doutro xeito”, afirma a autora do cartel.
Xunto a isto, a figura feminina que protagoniza o cartel ilustrador e que evoca unha medusa leva tatuadas na pel diversas verbas directamente relacionadas co FIC Vía XIV: as diversas categorías do certame. Deste xeito, ponse en valor directamente o festival e a súa programación “porque só se tatúa aquilo que se considera importante”, conclúe López Pérez.
Deixa unha resposta