- Un grupo de 20 alumnos internacionais que visitan o I.E.S Xesús Taboada Chivite no marco do programa Erasmus + asistirán ao ciclo “As dúas caras do Sahara Occidental”, programado dentro do certame de curtas da vila
- O FIC Vía XIV de Verín integrará no seu equipo de traballo a dúas estudantes norteamericanas da Universidade de Clemson (Carolina do Sur)
Verín, 21 de novembro de 2019.- O FIC Vía XIV de Verín vai permitir, nesta cuarta edición, que se intercambien experiencias e se fomente a formación en torno á cinematografía para un grupo de alumnos e alumnas de diversos países que visitarán a vila no marco do programa Erasmus +. Un grupo de 20 estudantes, procedente de diversos países coma Finlandia, Hungría, Italia e Portugal, terá a oportunidade de visionar a programación integrada no marco da actividade paralela As dúas caras do Sahara Occidental, durante a mañá do xoves 5 de decembro na Casa da Cultura de Verín.
O grupo forma parte dun programa de intercambio estudantil co I.E.S Xesús Taboada Chivite e visitará a vila do Támega na semana na que se celebre o certame. “Trátase dun grupo de estudantes que participan nun programa da UE cuxo obxectivo é apoiar a educación, a formación e a actividade deportiva no continente”, sinala César Sánchez Pampín, director do centro que acolle aos estudantes.
Un proxecto de escola inclusiva
Tal e como pon en valor Sánchez Pampín, o I.E.S Xesús Taboada Chivite foi seleccionado para participar neste programa logo de presentar un proxecto que “desenvolve accións en prol dunha escola inclusiva e igualitaria”. “O proceso de selección foi complexo porque se presentaron 429 solicitudes e só seleccionaron 209 de todo o territorio español”, apostila o director do centro”.
Non serán os únicos estudantes estranxeiros que visiten Verín durante a semana do Festival Internacional de Curtas. Ata a vila tamén se achegarán dúas estudantes da Universidade de Clemson (USA) que formarán parte do grupo de traballo do certame.
Deixa unha resposta